عليشير نوايي شئعيرلريندن:

کیچه کیلگوم دور دییبان اول سرو گلرو کیلمه دی

کــوزلریمگه تانگ آتقـــونچه اویقــــو کیلمه دی

لحظه لحظه چیقتیـــم و چیکتیم یولیــــده انتظار

کیلدی جان آغزیمغه و اول شوخ بدخو کیلمه دی

عارضی دیک آیدین ایکانــده گر ایتتی احتیــــاط

روزگاریم دیک هم اولغانده قرانغــــو کیلمه دی

اول پریــوش هجریدین کیم ییغلادیم دیـــوانه وار

کیمسه بارمو کیم انگا کورگانده کولگو کیلمه دی

کوزلرینگدین نیچه سو کیلگای دیب اولتورمانگ منی

کیم باری قان ایردی کیلگان بو کیچه سو کیلمه دی

طالب صادق تاپیلماس یوقسه کیم قـــویدی قدم

یولغه کیم اول قــــدم معشــــوق اوترو کیلمه دی

ای نوایی باده بیرله خرم ایت کونگلونگ اویین

نی اوچون کیم باده کیلگان اویگه قیغو کیلمه دی