فصل بهاری ایسته مه رم بلبل اولماسام

دیلداری نئینه رم اگر اهل دل اولماسام

حسرت گؤزویله طرف گلستانه باخمارام

مشتاق رنگ و بوی گول و سنبل اولماسام

عمرومده گئتمه رم گول گولزار سئیرینه

بلبل مثال طالب حسن گول اولماسام

عنقای قاف عزتیدیم سیندی پرلریم

ایندی گئنه اوچوب قاچارام بسمل اولماسام

ایجاد صفحه سینده غلط نقطه ام اگر

پابند زلف و خال و خط و کاکل اولماسام

بیر کیمسه یه دئمم الیمی توت کناره چک

گرداب بحر هجرده پا در گل اولماسام

زنجیرده گؤروب دئمه دیوانه آدیما

قویمارام بساط عشقه قدم عاقل اولماسام

صرافین آدی غلط محض دیر منه

صراف اولان نگاریله گر یک دل اولماسام

 سروده : حاجی رضا صراف تبریزی