شاعر : شاه اسماعیل ختایی

ایلقیت ایلقیت اسه ن یئل حاجی بكتاش!

[ای نسیم نرم نرمک وزان، ای حاجی بکتاش!].

گئجه گوندوز خیالینا یانارام

بیر گئجه رؤیاما گیر، حاجی بكتاش

گوناه كارام، گوناهیمدان بئزه ره م

اؤزوم دارا چكدیم، سور، حاجی بكتاش

 

یاندی بو غریب قول، نه دیر چاراسی؟

یینه تازه له ندی اوره ك یاراسی

اونولماز دردلره درمان اولاسی،

بو سنین بدنین، سور، حاجی بكتاش

 

دردیمین درمانی، یارامین اوجو،

دؤرد گروه مووجوددور، گوروه-ی ناجی

بئلینده كمری، باشیندا تاجی،

اوزوندن آخیر نور، حاجی بكتاش

 

صادیقلارین صدقی، عاشیغین رنجی،

پیرلرین پیری سین، گنجلرین گنجی

هم دریا، هم صدف، هم درّ، هم اینجی،

هم عومّان، هم ایرماق، گؤل٬ حاجی بكتاش

 

گاهی بولود اولوب گؤیه آغارسین

گاهی یاغمور اولوب یئره یاغارسین

آی میسین، گون موسون، قاندان دوغارسین؟

ایلقیت ایلقیت اسه ن یئل٬ حاجی بكتاش

 

آرینین یاپدیغی بالا بنزه رسین،

شو غوربت ائللرده كؤنلوم ایله رسین

بند ائدیب ده، ایقرارینا باغلارسین،

ساییلین ساتدیغی قول، حاجی بكتاش

 

دردیمند ختایی، ائیله ر نیازی،

اولو پیر، قاتاردان آییرما بیزی

بو محشر گونودور، ایسته ریز سیزی،

محمد اؤنونده جار، حاجی بكتاش.

منبع : سوزموز؛ مهران بهاری