ائلچيليك!: گئتميشيك خالا اوغلوما ائلچي، قيز چاي گتيريب، خالا اوغلوم باشين ساليب آشاغي، ياواشجا دئديم اوتانيسان؟قاييديب دئيير: - ب يو ب يئره قيزيل تؤكوبلر فيكيرلشيرم نجور اونلاري ييغا بيلرم

 قونشو اوشاغي!: قونشونون اوشاغي قاچا-قاچا گليب آناسينا دئيير: آنا منه پول وئر؟ آنا دا دئيير: گئديسن قاقا آلاسان؟ ب يو ب سرمايه ييغير گئدير توكان آچا!!

 فوتبال: يولداشيملا ايلشميشيك تيراختور-ايستيقلال اويونونا باخيريق، 90 دقيقه دن سونرا تيراختور 2-1 اودوب، يولداشيم قاييديب دئيير: بابا سنده بئكارسان ها، يانمنه 22 نفر قاچير بير توپون داليسيجا؟!! گؤلمكدن قيريليب دئديم: ب يو ب 22 دنه توپ قاچاجاق بير نفرين داليسيجا؟

  آلما ساتماغ : دورموشام سويوقدا خيياوان قيراغيندا آلما ساتيرام، بير كيشي ماشيندان دوشوب گليب دئيير: بي، ساتيرسان؟ دئديم:‌ب يو ب قويموشام بيردن يولدان كئچن لر آجيخاندا يئسينلر منده باخام .

 بزكليك ائوي (آرايشگاه) : اوتورموشام بزكچيليك ائوينده، سيرام يئتيشه، بيري قاپيني آچيب گيريب ايچري، بزكچي يه دئيير: آغا توك قيسالديرسيز؟ بزكچي گوله-گوله دئدي: ب يو ب ييغيش ميشيق گؤرك كيمدن چوخ توك چيخار؟ او بيريلر اونا اؤدول (جايزه) وئره لر.
 

اينترنت: طرف گليب باش ساييمي نا (سر شماري اوچون)، دئيير اينترنت قولانيرسيزمي؟ دئييرم: هه يه! دئيير: ائوده بيلگي سايار (كامپيوتر) وارينيزدي؟ دئييرم: ب يو ب اينترنه تلويزيون ايله گئديريك؟!!

قوربان پايي: اليمده قۇربانلێق اتي آپارمێشام قوْنشۇلارا پايلايام. سوْرۇشۇر: نذيردير؟دئگيرم: بـ يو بـ قوْيۇنۇنان مۆشكۆلۆمۆز وار ايدي وۇردۇق اؤلدۆردۆك. -گؤروش ائدن عزيزلريميزدن بيري بونو يوللاييب

 باييلماق: قيز خيياواندا باييليب، هامي ييغيشيب يانينا، طرف قاچا- قچا يولدان يئتيشيب دئيير: هوشدن گئديب؟ هامي بيردن دئديلر: بـــَ يو بــَ نوماييش وئريلر بيزده باخيريق!

 بال: گئتميشم باققال توكانيندان سود آلام.  دئيير پاكتي سود ايسته ييرسن؟ دئديم هه يه. ائله آغزيمي آچديبم دئيم ب...! تئز هاوار چكدي: اوغلان قاچ گئت گؤروم! بو «ب يو ب» لري كيم سيزه اؤيره ديب؟ دئديم آغا ايسته ييرديم دئيم بال وار؟ طرف اوتانيب دويونجا عذر ايسته يندن سونرا دئدي: يئمك اوچون ايسته ييرسن؟ دئديم: ب يو ب ايسته ييرم وئرم آري لار يئسن تازادان بال دوزدسينلر!  بونو دئديم تئز توكاندان قاچديم!

 كيتاب ائوينده : گيريب كيتاب ائوينه دئيير آغا ايران تورك لرينين اسكي تاريخي وارينيزدي؟ ساتيجي چؤنوب دئيير: كيتاب دي؟ بــَ يو بــَ تاريخين صحنه لرين ايستيرم.

 ويندوزوم كوسوب!: يولداشيم گليب بيلگي ساياريما ويندوز وورا، بيلگي ساياري آچيب ويندوز اوسته گلمير دئيير، كورلانيب؟ بـــَ يو بـــَ مندن كوسوب اوسته گلمير

 مانكنه توكاندا: مشتري گيريب توكانا دئيير: آغا بو مانكنه گئيديرديگينيز پالتاري ساتيرسيز؟ بـــَ يو بـــَ اونو گئيينديرميشيك سويوق ديمه سين .

یازان : ائلمان اورمو اوغلو