شهــریاریــم دئیه لی زوربـولاغیمدی تـورک دیلی

ایشیق آ یدین یولوما چیل-چیراغیمدی تورک دیلی

هر نه بال وارسا بــو دونیــادا ییغیشمیش بـو دیله

قاش گؤزوندن نه دئییم قان چاناغیمدی تورک دیلی

آناما قـــوربان اولــــوم سنله آچیــب دیــــر دیلیمی

گوبه ییــم قــویلانالی باغچا ـ باغیمدی تورک دیلی

گـونــو سایمــاز پاپاغــیم بئلیمده شالــدیــر اینانین

یار الینــده، یادا قارشی یاراغیمـــــدی تـورک دیلی

بیــر عؤمــوردور قاچیــرام سنله دایـانمــاز اوره ییـم

یورولان چاغـدا باش آلتیــم ،یاتاغیمـدی تورک دیلی

بوللـوق ایللـرده جانیمسان دئیــه بــرک تامــارزییام

تپه دن دیــرناغـا گـــؤزدور، آیاغیمـــدی تورک دیلی

محتشــم تبــریـــزیمیز یــار قوجاغینـــدا آد تاپیــب!

یادا اوز وئرمـز آجیق، قاشقـــاباغیمـدی تورک دیلی

چنلی چاغـلار کئچیــریب شنلی دومـانلار دوغانیم

اوزونـو یـورما داغیلمــاز تیفاغیمـــدی تــورک دیلی

زامان آغـــزینـــدا کی حاققیـــن آلاجاق قویماز اودا

قاچـاق ایللـــرده نبی تک دایاغیمـــدی تورک دیلی

قانی قاینــار دامــاریــلا سوواریـب ســؤز زه میمی

کار قولاقدان باج آلان سس سوراغیمدی تورک دیلی

ال آچیقدیر بو سولئیمان قوشومـوز ناغیـــل دئییــل

ائلیمیـن گوزگوسودور، ساچ داراغیمدی تورک دیلی

یئنه فرهــادیما شیــرین دوشه ییبدی سوفــراسین

داد- دوزونــدان نه دئییـــم قایقاناغیمدی تورک دیلی

یئـــری واردیـــــر بو قونــــاقلیقدا ثریـــام  توی ائده!

ائـــده جکدیــر متحیـــر ماراغیمـــدی تــورک دیلی

 شاعر:متحیر