آنا

بير جوجوق[1] ايديم يئره گومديلار[2] سني

حياتا قانادسيز آتديلار مني

باخ نئجه پوزولوب عمرين گلشني

حيات سن سيز منه زنداندير آنا!

...

قوينوندا[3] بسله نر[4] گوزل ديلكلر[5]

لاييقدير سجده يه سنه ملكلر

نرده[6] سن، گوزلريم هَپ[7] سني بكلر[8]

باخ إولادين ناسيل[9] گیرياندير آنا!

...

سن بير گونش ايدين، دؤغدوندا باتدين

يازيق إولاديني غملره آتدين

بير جاواب وئر، هانكي مورادا چاتدين

تورپاقلاردا نئچه زاماندير آنا!؟

...

بير آه چكسم سنسيز قوپمازمي طوفان؟

عزيزيم آنا جان، گؤزوم آنا جان

يوموق گؤزلريني آچ دابير اؤيان

ايندي زامان باشقا زاماندير آنا

...

ييخيليب پايينه اؤلمك ايسته رم

آناليق مهريني گؤرمك ايسته رم

سني گؤرمك ايچون اؤلمك ايسته رم

تسلليم آه ايله فغاندير آنا

...

شاعرین آدی : صمد وورغون

 

آتیرمالار:

 

[1] -اوشاق

 

[2] -قویلادیلار

 

[3] -قوجاقوندا

 

[4] -پروریش تاپار

 

[5] -آرزولار

 

[6] -هاردا

 

[7] -همیشه

 

[8] -گؤزه تلر

 

[9] -نیجه