تورکچه طنزلر

یازان : دوكتور جئري

باسين يامانا!

حاجيلاريميز شئيطانا داش آتديقدان سونرا موللالاريندان سوروشورلار:

-‌ آغا داشيميز قورتولدو؛ ايندي نئيله‌مه‌لي‌ييك؟!

موللا دئيير:

-‌ داشينيز قورتولدويسا باسين يامانا!

حاجيلار يوموروقلاريني گؤيه قالديراراق سس سسه وئريرلر:

-‌ مرگ بر شيطان ... مرگ بر شيطان ...

 

شئيطانين بالاسي!

   داش آتما سيراسيندا شئيطان حاجيلارين بيري‌نين بيلَگيندن ياپيشاراق گيلئيله‌نبر‍:

-  حاجي ايسكندر سن نييه؟ ... سنكي اؤز بالامسان!

 

قاپيلاري آچين، قاپيلاري باغلايين!

   "دليلريميز عاغيللي كيمي دير، عاغيلليلاريميز دلي كيمي" دئيينلر چوخدا يانيلماييبلار. شهريميزين دليسي؛ جينلي جعفر حاجيلار مكّه‌يه گئدنده چوماغيني گؤيده فيرلاتاراق بازاردا جار چكر:

-‌ قاپيلاريزي آچيق قويون، حاجيلار گئتديلر!

حاجيلار قاييداندا ايسه :

-‌ قاپيلاريزي برك باغلايين حاجيلار گلديلر! -‌ دئيه هاميني اويارار.

 

نامازي واختيندا قيلان!

   محله‌نين موللاسي مكّه‌يه گئدركن مسجيد اهلينه :

-‌ نامازي واختيندا قيلان؛ ترك ائله‌مه‌ين بيريسيني تاپيب من گله‌نه‌جن پيشناماز ائله‌يين -‌ دئيير.

موللا آللاه ائوي‌نين زيارتيندن قاييداندا گؤزلرينه اينانا بيلمير؛ مسجيد اهلي بير تلويزيونون داليندا سيرالانيب ناماز قيليرديلار.

ناماز بيتديكدن سونرا موللا اؤفكه ايله مسجيد اهلينه سسله‌نير:

-‌ هئچ تلويزيون داليندا ناماز قيلينارمي؟!

گنجلرين بيري:

-‌ آغا اؤزنوز دئمه‌دينيز نامازيني واختيندا قيلان، ترك ائله‌مه‌ين بيريني تاپيب پيشناماز ائله‌يك ... بيز تلويزيوندان ياخشيسيني تاپا بيلمه‌ديك ... اينانين آغا! ... دوز فوتبالين شيرين يئرينده ... اويونو كسيب ناماز قيلير ... -‌‌ دئيه موللاني باشاسالماغا چاليشير.

 

شئيطانين بايرامي!

شئيطاندان، " ايلين هانسي آييندا بايرام ائدرسن؟" دئيه سوروشدوقدا شئيطانجاسينا گولوب:

-‌ ذيججه آيي!- دئير- بو آيدا  ائل طايفام دونيانين دؤرد بوجاغيندان گؤروشومه گلرلر!


طواف

   دئييلنلره گؤره : مكّه‌ده ان چوخ طواف ائله‌ينلر ايرانلي حاجيلاردير. اونلار يئددي يول يئرينه گونده يئتميش يول مكّه‌نين بازاريني طواف ائله‌يرلر.

 

آللاه يولوندا قوربانليق

حاجيلارين بيريندن سوروشدولار:

-‌ حضرت ابراهيمين يئرينه اولسايدين اوغلونو قوربان ائله‌ييب باشيني كسردين مي؟

حاجي بيرآز دوشونوب دئدي:

-‌‌ باشيني كسمك يئرينه ايته‌له‌يرديم ماشين قاباغينا ... بئله‌جه همي آللاه يانيندا اوزو آغ اولارديم؛ همي‌ده دييه‌سيني آلارديم ...

 

مكّه ثوابي

بير كيشي مكّه‌يه گئده‌جك‌ايدي. اونون قونشولوغوندا بير يوخسول قوجا-قاري ياشاييردي. او چوخلو سال-چيخ ائدندن سونرا سفر پولونو قوجا - قارييا وئريب مكّه‌يه گئتمير. قوجا-قاري هر نفسده ياخشي كيشي‌يه دوعا ائديب حوققاني سوموروردولار.

 

مكّه‌ني ساخلاماق

قيتميرليقدا (خيسيس‌‌ليكده) تايي تاپيلمايان حاجي ايسكندر مكّه‌دن قاييداندان سونرا توكانينا شاگيرد توتور. قونشولاري شاشيريب بونون ندنيني سوروشورلار.

حاجي:

-‌ آليش - وئريش يالانسيز اولمور، منده مكّه‌مي ساخلاماق اوچون شاگيرد توتموشام يئريمه يالان دانيشسين.