مدرسه لرین باشلانماغی باهاناسینا :

مختار تمری:

بیر دفعه کلاسدا قراریدی اوشاقلاردان درس سوروشام، اوشاقلارین بیرینین آدین چاغیردیم .

 دوردو آیاغا ( من درس سوروشاندا اوشاقلارین استرسی اولماسین دییه ٬قاباغا چاغیرمازدیم٬ یئرلرینده سوروشاردیم ) .

اؤزوم بوله بوله سورومو ( سوالیمی ) بوجور سوروشدوم : 

 « کار ارّه چیست؟ »

اوشاق بیر آن دایانیب و دیل دوداغین چئینه دی ، سورومو بیر داها سوروشدوم ، اوشاق رنگی سارالار کن باخانمامیشام آغا دئدی باشین سالدی آشاغا .

گولر اوزلو دئدیم  : « یاخجی اشکالی یوخدو ٬ قوی آیری سوال سوروشوم  » کتابی یالاندان واراقلار کن هامان سورونون تورکوجه سوروشدوم ، دئدیم :

 یاخجی سن ده بوخجونون ( بعضی یئرلرده بیخجی و البته من درس دئدییم یئرده بوشقو دییردیلر ) ایشی نمنه دی ؟ 

چوخ رلکس و اؤزونو درسینی باشاران کیمی گؤرسه درک جاواب وئردی :

آغا بوشقونان آغاج کسه للر باخدیم اوزونه  ساغول بالا ٬ ساغول دئدیم، گؤزلرینده بیر غرور گؤروردوم٬ بوننان کی ائلیه بولموشدو سوروما جواب وئرسین اؤزون باش اوجا حس ائدیردی .

 بیر آن اؤره ییم توتولدو . حس ائلدیم گؤزلریم دولدو من بیر دقیقیه قاییدیرام دئدیم اوشاقلارا و کیلاسدان چیخدیم . اوخولون ( مدرسه نین ) حیطینه گئتدیم. گؤزلریم دولموشدو٬ اللریمی اووشدورارکن آددیم آتاردیم. چوخ سؤزلر بئینیمده گَزیردی چوخ سورولار  :

بو اوشاغین گوناهی نمنه دی؟ نیه گرک مجبور اولا آیری بیر دیلده درس اوخویا؟ بو اوشاق کی اؤز دئدیینه گؤره درسه باخانمامیشدی آمما بو سورویا یاخشی جا جواب وردی٬ اگر بو ایلک ( اول ) گوندن اؤز دیلینده یازیب اوخوسایدی گؤر اوندا نئجه یاخشی درسی باشاراردی؟ بو اوشاغین باش اوجالیغین کیم بونون الیندن آلماق ایستییر؟ نیه گرک بو اوشاغین غرورون سیندیراق؟ گؤزلرینده کی غرور و اؤز گووه نج ( اعتماد بنفس ) ندن گرک واز کئچیله؟ بو اوشاغین باش آشاغا ( سرخورده) اولماغیندا کیم گوناهکاردی؟ بیزیم بو آرادا گؤرویمیزی ( وظیفه میز ) نمنه دی؟

بو سورولارا اؤزومده جاواب وئردییمه چالیشماق ایستییردیم کی بیردن اوشاقلارین دوره مه ییغشماغین و آغا گل بیزینن اوینایاق دئدیکلرین دویدوم (حس ائله دیم ) زنگ وورولموشدو و اوشاقلار حیطه چیخمیشدیلار ( من استراحت زنگلری چوخ چالیشاردیم دفترده اوتوروب چای ایچمک یئرینه اوشاقلارینان حیطده اولام ) اولسون گئدک اوینایاق دئدیم و باشلادیم اوشاقلارینان اویناماغا اوینویا، اوینویا « من بو اوشاقلارینان چوخ خوشبختم یاخشی کی سیز وارسیز یوردومون بالالاری » دیلیمین آلتیندا دئییردیم.