نمرود اودونون حضرت ابراهیمه (ع) گولوستان اولماسی :

خلیل ابراهیم حضرتین (ع) عظمتی او قدر بؤیوکدور کی اونون هانسی دینه منسوب اولدوغو باره‌ده دینلر آراسیندا منازعه وار. حتّی حضرت ابراهیمین (ع) مشرکلر آراسیندا دا سئونلری واریدی و اونون اثرلری مکّه‌ده اونلارین طرفیندن زیارت ائدیلیب محترم ساییلیردی.

حضرت ابراهیمین (ع) نسبی حضرت آدمه (ع) قدر تورات کتابیندا گلیب. توراتین نسب‌نامه‌لری اسلامی کتابلارا دا یول تاپیب و اصلینه و منشأینه دقّت ائله‌مه‌دن قبول ائدیلیب.

کتاب اهلی‌نین اینادیغینا گؤره، (توراتدا کی یازیلان حادثه‌لری حسابلایاندا) حضرت ابراهیم تقریباً میلاددان ایکی مین ایل اوّل، یعنی دؤرد مین ایل بوندان اوّل، اور شهرینده دنیایا گؤز آچدی. توراتدا یازیلانا اساساً او اوّل‌لر یوخاری مرتبه معناسیندا اولان «ابرام» آدلانیردی. دوخسان دوققوز یاشیندا اولاندا، الله تعالا اونون آدنیی «ابراهیم»ـه (ملّتلر آتاسی معناسیندا) چئویردی.

اور شهری یوز ایل بوندان اوّل عراقدا «فُرات» قیراغیندا تورپاق آلتیندان چیخاردیلدی.

توراتین دئدیگینه اساساً حضرت ابراهیمین آتاسی[1] «تارح»، اوغلو ابراهیمی و اونون حیات یولداشی «ساره»-نی و اؤز نوه‌سی «لوط»-و گؤتوروب اؤزو ایله فلسطینین غربینده کنعان یوردونا یوللاندی. اونلار یولدا سفرین ادامه‌سیندن واز کئچیب، ایندی تورکیه تورپاقلاریندا یئرله‌شن «حران» شهرینده قالدیلار.

 

حضرت ابراهیمین (ع) تاریخینده، ایندی‌کی توراتدا اونلارا اشاره اولمایان، ایکی مهم حادثه وار :

 1. او حضرتین بت‌لاری سیندیریب اودا آتیلماسی.

 2. کعبه‌نین بناسی.

قرآن کریم انبیاء و صافات سوره‌لرینده اونون بت سیندیرماسی و اودا آتیلیب اودون اونون اوچون گولوستانا چئوریلمه‌سی باره‌ده یازیب. بو جریاندا حضرت ابراهیم (ع) بت‌لارین گوجسوز اولدوغونو گؤسترمک اوچون اونلاری سیندیریب، بالتانی بؤیوک بُتین چیگنینه قویوب ثابت ائلیر کی بو جانسیز شئیلر عبادت ائله‌مه‌لی دئییل‌لر. اور پادشاهی نمرود، بؤیوک اودون قالانیب، حضرت ابراهیمی (ع) اونون ایچینه آتیلماسی‌نین امرینی وئریر. اونلارین حیرتلی گؤزلری قارشیسیندا الله-ین اذنی ایله اود سویویوب سؤنور و گولوستانا چئوریلیر.

[1] . قرآندا حضرت ابراهیمین (ع) آتاسی بت پرست آزر ده یازیلسا، شیعه‌نین ایناندیغینا گؤره حضرت ابراهیم (ع) حضرت محمد پیغمبرین (ص) اجدادلارینداندیر و پیغمبریمیزین (ص) بوتون بابالاری حضرت آدمه (ع) قدر بیر الله-ی عبادت ائدیبلر. و انعام سوره‌سی‌نین 74-جو آیه‌سینده صحبتی اولان آزر، حضرت ابراهیمین عمیسی اولوب. عرب دیلینده بعضاً عمی‌یه أب سؤزوندن‌ده استفاده اولونار.

- دین خادمی . میرزا عبدالصمد ملکی