دوكتور جئري :

-‌ گوروپ...گوروپ...

بير آزدا گئجيكسه‌ايديم قاپيني سينديراجاق‌ايديلار. آياق يالين ائشيگه قاچديم؛ قاپيني آچينجا "بيسميللاه" دئييب اودقوندوم. آستانادا موللانصرالدينين روحو دايانميشدي. يئپ-يئكه بير ساريق باغلاميشدي باشينا (عيني شكيل‌لرينده گؤردوگوم كيمي). قوجاغيندا بير توربا سوسيس كالباس وار ايدي. " آمان... موللانين ائششگيني قولتوغونا وئرميشلر" گئچدي بئينيمدن...

-‌‌‌ جين گؤرموش سن؟ نييه بئله باخيرسان؟!- دئدي موللانين روحو.

يئنه لال-لال موللانين شيشمش اوز-گؤزونه گؤز تيكديم.

-‌ منم پروفسور نصرالدين... تانيمادين؟..

ديليم آچيلدي:

-‌ پروفسور سن سن؟ منده باياقدان دئييرديم بلكه موللانصرالدينين روحوسان!.. بويور.. بويور ...

پروفسور نصرالدين ايچري‌يه گئچديكده:

-‌ پروفسور بو ساريق ندير؟ لاپ اؤزونو  موللا نصرالدين اوخشاتميشسان- دئيه سوروشدوم.

پروفسور سينيرلندي:

-‌‌  بو قوزو سن اتگيمه تؤكموش سن!

شاشيرديم:

-‌ نه قوزو؟!

-‌‌‌‌ ‌سن دئمه‌سه‌ايدين قيز ممه‌سي يئ، منيم باشيم  ياريلمازدي!...

دوا -درمانين باهالاشيب تاپيلماماسي‌نين آردينجا بير نئچه بيتگيسل طب كيتابي اوزوندن اوتاچيليغا باشلاميشديم. سككيز دوققوز گون قاباق، پروفسور نصرالدين تئلفون ووروب قان باسينجي‌نين يوكسك اولدوغوندان، يئددي دردي‌نين بيربيرينه قاريشديغيندان دانيشميشدي. منده دردي‌نين علاجيني، قيز ممه‌سي يئمكده گؤرموشدوم. تئلفونو قونوشوغوموزدا دؤنه- دؤنه قيز ممه‌سي سؤزونو مطبخدن ائشيدن پروفسورون آروادي، اريني يانليش آنلاميش تاوا ايله سوراغينا گلميشدي.

اوزگون- اوزگون پروفسور نصرالدينه دئديم:

-‌ هارادان بيله‌ايديم من تئلفون تئلي‌نين  بو باشيندا توركجه‌ميزي يابانچي سؤزلردن قورماق ايسته‌يركن او باشيندا سيزين باشينيزي ياراجاقلار!

پروفسور نصرالدين آجي-‌آجي گولومسه‌يه‌رك قولتوق جيبيندن بير پارچا كاغيذ چيخارديب منه اوزاتدي.

-‌‌ بو نه‌دير پروفسور‍؟- دئديم.

پروفسور باشينا تاوا دَيندن هوشونون داغيلديغيني بو اوزدن بللگه تاپشيرمالي شئيلري يازمالي اولدوغونو آچيقلاياراق ائكله‌دي:

-‌ قاينانام اوزون سوره‌دير خسته‌دير؛ آرواد آغادا گونده مني يالقيز بوراخيب آناسي‌گيله گئدير. داها سوسيس كالباس يئمكدن يورولموشام. نولور باخ گؤر قاينانامين دردينه بير داو تاپا بيلرسن؟...

كاغيذي بير ايكي يول گؤزدن گئچيرديم . بيردن سئوينجدن چيلتيك چاليب "تاپديم!" دئيه قيشقيرديم. آنجاق چوخ تئز سئوينجيم يئريني نيگرانليغا وئردي.

بو دَييشيم پروفسورون گؤزوندن يايينمادي:

-‌ نولدو؟!

-‌ پروفسور قاينانانين دردي‌نين داواسيني تاپميشام آنجاق قورخورام هوشوندن سونرا بو سفر باشيني الدن وئره‌سن!

پروفسورون گؤزلري بؤيودو.

-‌ دردي‌نين داواسي ندير؟...

باشيمي آشاغي ساليب:

-‌ دانا داششاغي!-  دئديم

................

اتك يازيلار:

اوتاچي: دوكتور، طبيب، عطار

بللك: حافيظه، يادداش

بيتگيسل: گياهي

دانا داششاغي: بير چئشيد بيتگي

دَييشيم: تغيير

سينيرلنمك: عصبي اولماق

شاشيرماق: تعجب ائله‌مك

قان باسينجي: قان فشاري

قوز: جويز، گيرده‌كان

قيز ممه‌سي: گريب فروت

گئجيكمك: يوبانماق

يايينمادي: مخفي قالمادي

يوكسك: اوجا، يوخاري